Turmush — 3-4-март күндөрү Талас шаарында кыз-келиндер арасында спартакиада өттү. Бул тууралуу мэриянын басма сөз кызматы билдирди.

Маалыматка караганда, бул мелдештер 8-март майрамына карата мекемелер арасында спортту кеңири жайылтуу жана кыз-келиндерди сергек жашоого үндөө максатында өткөрүлдү. Ага Талас шаарындагы мекеме, уюмдардан 10 команда катышып, волейбол, аркан тартыш, тогуз коргоол, кол күрөш, эстафета боюнча күч сынашты.

Жыйынтыгында волейбол боюнча 1-орунду №1 орто мектеп, 2-орунду «ПЛ-90» командасы, 3-орунду «Бай түшүм» командасы ээледи. Эстафета боюнча 1-орунга «Банкирши» командасы ээ болсо, 2-орунга медколледж, 3-орунга «ПЛ-90» командасы татыды. Аркан тартышта боюнча 1-орунду №1 орто мектеп, 2-орунду медколледж, 3-орунду «Талму» командасы ээледи.

Байгелүү орунду ээлегендерге акчалай сыйлыктар тапшырылды.