Turmush — 2022-жылдын 22-23-июль күндөрү Ысык-Көл облусунун Түп районуна караштуу Каркыра жайлоосунда Түгөлбай Сыдыкбековдун 110 жылдыгы жана Советбек Жумадыловдун 90 жылдык мааракесине арналган эл аралык маанидеги иш-чара өтөт. Бул тууралуу уюштуруучулар тобу билдиришти.

Маалыматка караганда, 22-июль күнү саат 10:00дө иш-чаранын расмий ачылышы болот. Анда «Манас» эпосунан үзүндү айтуу, акындардын айтышы, ат оюндары, ат чабыштын түрлөрү, оодарыш, кыз куумай, көк бөрү жана күрөш өтөт.

23-июлда мурунку күндүн оюн-тамашалары улантылып, жыйынтыктары чыгарылып, жеңүүчүлөргө сыйлыктар тапшырылат. Ошондой эле театралаштырылган коюлма «Т.Сыдыкбеков жана С.Жумадылов сахнада» фильми көрсөтүлөт.

Байге фонду 2 миллион сомдон ашып, аламан байгеге, жорго салышка, көк бөрүгө, кыргыз аттарынын чабышына жана күрөштүн 80 килограммга чейин жана 80 килограммдан жогору балбандарга 2 унаа, бардык баш байгеге 6 унаа коюлат. Акындардын байгесине бир миллион сом каралып жатат.

Бул иш-чарага Кыргыз Республикасынын президенти Садыр Жапаровдун келиши күтүлүүдө.