Turmush — Кечээ, 27-май саат 16:30дар чамасында жааган жаандын кесепетинен Кадамжай районунун Орозбеков айыл өкмөтүндө сел жүрдү. Бул тууралуу ӨКМден кабарлашты.

Маалыматка караганда, Охна сайынан сел жүрүп, Учкун, Бостон, Кара-Кечүү, Больничная, Жоо-Кесек, Коргон тилкелерине баруучу 7 бетон шакекче менен курулган көпүрөнүн айланасындагы кум-шагылдарды агызып кеткен. Сайдын 700 метр жээгин сел суулары жеп, Күлдү, Гараж жана Өндүрүш айылдарында 600 метр ички чарбалык арыктарды, Суу пайдалануучулар ассоциациясына (СПА) караштуу 50 метр сугат каналын кум-шагылга толтурган. Суу бөлүштүргүч каналды бузуп, 2 гектар айдоо жерин суу каптаган. Ал жерде тактоо иштерин жүргүзүүгө ӨКМдин Баткен облустук башкармалыгынын башчысы О.Пазылов жетектеген ыкчам топ тартылган.