Turmush — Жалал-Абад облусунда дайынсыз болуп жаткан 15 жаштагы Абдумалик Султанбаев Ош шаарынан табылды. Бул тууралуу Turmush басылмасына Жалал-Абад облустук ички иштер башкармалыгынын басма сөз кызматынан билдиришти.

Буга чейин маалымдалгандай, Сузак районунун Винсовхоз айылынын 2007-жылы туулган тургуну Абдумалик Султанбаев ушул жылы 3-июнь күнү саат 10:30 чамаларда үйүнөн чыгып кеткен боюнча дайынсыз жоголгон. Анын апасы — 1973-жылы туулган М.Р. милицияга жана коомчулукка жардам сурап кайрылган.

Ош шаардык ички иштер башкармалыгынын жана Сузак РИИБдин балдар менен иштөө инспекциясынын кызматкерлери менен биргеликте жүргүзүлгөн издөө иштеринин жыйынтыгында өспүрүмдүн жүргөн жери аныкталган. Ал Ош шаарынан Сузак РИИБге алынып келип, апасына өткөрүлүп берилди.