Turmush — «Ош электр» ишканасынын башкы директорунун биринчи орун басары Асылбек Артыков жана Өзгөн райондук электр тармактарынын Жарыктандыруу жана чүмбөттөө кызматынын кызматкерлери сел жүргөн Салам-Алик айыл өкмөтүнүн Кош-Этер айылында тазалоо иштерине жардам берип, жабыркаган электр тетиктерин калыбына келтирүү иштерин жүргүзүүдө.

Маалым болгондой, учурда электр жарыгы берилди. 0,4 кВ аба чубалгыларында 2 электр мамычаларын сел алып кеткендигине байланыштуу 2 абонент (үй) жарыксыз калууда. «Ош электр» ишканасынын ыкчам оңдоо бригадасы нөөмөттө турушат. Тазалоо жана оңдоп-түздөө иштери бүтөрү менен жарык берилет.

Буга чейин ӨКМден 27-май күнү саат 19:30 чамасында Өзгөн районунун Салам-Алик айыл өкмөтүндө сел жүргөнүн кабарлаган.

Маалыматка караганда, жааган жаандын кесепетинен, кокту колоттордон келген сел суулар Кош-Этер айылынын ички чарбалык жолдорун каптап, 1 үйгө сел кирип, дубалын 1,3 метр бийиктике чейин кум каптаган. 18 үйгө кооптулук жаралган. Жогору аталган үйлөрдүн тургундары, туугандарына көчүрүлгөн.

Ошондой эле Алтын-Булак айыл өкмөтүнүн Чечебай айылында ички чарбалык жолдун 150 метр аралыгын жана 20 үйдүн короосун каптаган. Бүгүн жерине кошумча тактоо иштерин жүргүзүүгө ыкчам топ жана акимдин орун басары тартылган.