Turmush — Жалал-Абад облусунун Токтогул районунда мал уурулук менен алектенген шектүү кармалды. Бул тууралуу облустук милициянын басма сөз кызматы билдирди.

Маалыматка караганда, 2024-жылдын 25-апрелинен 3-майына чейинки аралыкта Токтогул районунун аймагында мал уурулук боюнча 5 учур орун алып, топтолгон материалдар РИИБдин кылмыштардын бирдиктүү реестрине катталган. Тергөө кызматы тарабынан Кылмыш-жаза кодексинин 205-1-беренесинин (мал уурулук) негизинде кылмыш иштери козголуп, тиешелүү кызматтарга тапшырмалар берилген.

Тергөөнүн жүрүшүндө аталган мал уурулук фактыларынын кесепетинен 5 баш уй, 1 баш жылкы уурдалып, жабырлануучуларга 300 000 сомдук материалдык чыгым келтирилгендиги такталган.

Ыкчам иликтөө иш-чараларынын жыйынтыгында Токтогул районунун Өзгөрүш айылынан Бишкек шаарынын 1-май райондук милициясында иштей турганын айтып, элдин ишеничине кирип, милициянын формасын кийип жана ок атуучу куралы менен жүргөн жеринен шектүү катары Токтогул районунун 1994-жылы туулган тургуну А.У. кармалып, тергөө кызматына камсыздалган.

Шектүү 4-май күнү Токтогул РИИБдин убактылуу кармоочу жайына киргизилген. Ал эми бүгүн, 6-майда баш коргоо чарасы Токтогул райондук соту тарабынан каралып, 1 айлык мөөнөткө камакка алуу түрү тандалды.

Алдын ала маалымат боюнча, алынган курал экспертизага берилди. Ал күжүрмөн курал эмес, газ-травматикалык тапанча болушу мүмкүн.

Бул куралды алуу үчүн тиешелүү органдардан уруксат алуу талап кылынбайт.

Учурда бул кылмыш иштери боюнча тергөө амалдары улантылууда.