Turmush — 18-май күнү Талас шаарында Талас шаардык ички иштер бөлүмүнүн кызматкерлери ата-энелер менен бирге жыйын өткөрдү. Бул тууралуу Талас ОИИБдин басма сөз кызматы кабарлады.

Маалым болгондой, Атай Огонбаев атындагы балдардын музыкалык мектебинде өткөн жыйынга шаардын аймагында жайгашкан 9 орто мектеп жана 1 лицей комплексте окуган 11-класстын жана 9-класстын окуучуларынын ата-энелери катышты. Анда 2021-2022 окуу жылынын аякташы менен 9-июнь күнү акыркы коңгуроо салтанатында окуучулардын кафе-ресторандарга отурушуна жана унааларды жалдоого тыюу салынганы эскертилип, ата-энелерге ​түшүндүрүү иштери жүрдү.

Жыйынга жалпысынан 100гө жакын окуучу жана ​ата-энелер ​катышты. Анда мектеп окуучуларына тиешелүү нускамалар берилип, массалык эс алуулар, салтанаттуу ​ майрамдоо иш-чаралардын өтүү тартиби талкууга алынды. Билим берүү мекемесинин кызматкерлерине алардын жоопкерчиликтери жана милдеттери айтылды. Ата-энелерге балдарына катуу көзөмөл кылып, кылмыштуулуктун жана укук бузуулардын болушуна жол бербөө боюнча маалымат берилди.

Мындай иш-чара облустун ар бир районунда пландалып, ишке ашууда.