Turmush — Талас шаарында каракчылыкка шектелип эки тургун кармалды. Бул тууралуу Талас ОИИБдин басма сөз кызматы билдирди.

Маалыматка ылайык, ушул жылдын 8-мартында белгисиз адамдар Талас шаарынын 1978-жылы туулган тургуну М.С.ны ур-токмокко алып, күч колдонуу менен уюлдук телефонун жана акча каражатын алып кетишкендиги тууралуу билдирүү келип түшкөн.

Аталган факт Талас ШИИБ тарабынан Кылмыштардын бирдиктүү реестрине катталып, Кылмыш-жаза кодексинин 207-беренеси (каракчылык) менен кылмыш иши козголгон.

Кылмыштын бетин ачуу максатында атайын жумушчу топ түзүлүп, иликтөө иштери жүргүзүлгөн. Натыйжада Талас ШИИБдин кылмыш иликтөө бөлүмүнүн кызматкерлери тарабынан Талас шаарынын тургундары — 1978-жылы туулган А. Т. жана 1979-жылы туулган У.Т. аттуу жарандар кармалган.

Алар Талас ОИИБдин убактылуу кармоочу жайына киргизилип, тергөө иштери жүрүп жатат.