Turmush — Ош шаарында ири алдамчылыкка шектелген чет өлкөлүк аял кармалды. Бул тууралуу бүгүн, 16-декабрда Ош ШИИБдин басма сөз кызматы билдирди.

Маалыматка караганда, 2023-жылдын 7-декабрында Кара-Суу райондук ички иштер бөлүмүнө Кара-Суу районунун 1968-жылы туулган А.О. аттуу тургуну арыз менен кайрылган. Анда 2023-жылдын ноябрь айынын башында сырттан тааныш болгон Гуля аттуу аял анын ишеничине кирип, зер буюмдарын алдап алып кетип, акчасын бербей койгондугун билдирген.

Кылмыш-жаза кодексинин 209-беренеси (алдамчылык) менен козголгон кылмыш ишинин алкагында ыкчам издөө иш-чаралары жүргүзүлүп, кылмышка шектүү катары коңшу өлкөнүн 1988-жылы туулган К.Г. аттуу жараны кармалып, камакка алынды.

Тергөө амалдарынын жүрүшүндө шектүүнүн үстүнөн ушундай эле мазмундагы 12 арыз түштү. Жабырлануучуларга келтирилген зыяндын жалпы суммасы 2 млн 150 миң сомду сомду түзгөн.

Учурда шектүүнүн башка кылмыштарга тиешеси бар же жок экенин аныктоо боюнча тергөө амалдары уланууда.