Turmush — Кызыл-Кыя шаарындагы билим берүү мекемелеринин биринде мугалим окуучуну токмоктогону боюнча Баткен ОИИБдин Басма сөз кызматы маалымат берди.

Социалдык тармактарда тараган видео боюнча Кызыл-Кыя ШИИБдин жашы жете электердин иши боюнча аймактык тескөөчүсү билдирме менен кайрылып, бул билдирме 2024-жылдын 24-январь күнү Кызыл-Кыя ШИИБдин маалыматтардын электрондук журналына катталып, текшерүү иштери жүрө баштаган.

Анын жүрүшүндө видео тасмага түшкөн 35 жаштагы Г.О. аттуу мугалим 2024-жылдын 22-январь күнү саат 22:30дар чамасында 16 жаштагы окуучу уктоо бөлмөдө достору менен сүйлөшүп отуруп, бакырып күлгөндүктөн аны коридорго алып чыгып, бетине колу менен ургандыгы маалым болгон.

Бул факт Кылмыш-жаза кодексинин 280-беренеси (бейбаштык) боюнча сотко чейинки өндүрүш иши башталды. Жашы жете элек 16 жаштагы балага соттук-медициналык экспертиза дайындалып, Кылмыш-жаза процессуалдык кодексинин 96-97-беренесинин негизинде 35 жаштагы Г.О. убактылуу кармоо жайына киргизилди.

Учурда дагы башка окуучулардын токмоктолушу боюнча текшерүү иштери жүргүзүлүп, тергөө иштери башталды.