Turmush — Базар-Коргон райондук ички иштер бөлүмүнүн жана райондук билим берүү бөлүмүнүн кызматкерлери тарабынан эрте никеге туруунун алдын алууга багытталган видеоролик даярдалды. Бул тууралуу Жалал-Абад ОИИБдин басма сөз кызматы билдирди.

Базар-Коргон районундагы №44 Анакыз Жумабаева атындагы орто мектебинин окуучулары роль аткарып, турмушка эрте узатылган кыздын жашоосун чагылдырышкан. Роликте өз курбулары менен катарлаш сабакка бара албай же жашоосу жакшы жагына өзгөрбөгөн келиндин тагдыры камтылган.

Милиция кыздарды эрте турмушка узатуу кылмыш экендигин жана ага карата мыйзам чегинде жоопкерчилик каралганын эскертет.

• Жалал-Абад облусунда 2022-жылдын 5 айында эрте никеге туруу боюнча 32 учур катталган.