Turmush — Баткен шаарында маркум журналист Арзыгүл Галымбетованы классташтары эскерип, спорттук мелдеш уюштурушту.

Арзыгүл Галымбетова 2003-жылы Баткен шаарындагы Сыдык Айтматов атындагы орто мектебин аяктаган. Быйыл мектепти аяктаганына 20 жыл болмок. Аны эскерип классташтары шаар ичиндеги кыз-келиндер арасында волейбол, мырзалар арасында футбол мелдешин өткөрүштү. Спорттук иш-чарага буга чейин мектепти аяктаган классташтар катышты.

Жеңүүчүлөргө Арзыгүл Галымбетованын классташтары тарабынан акчалай сыйлыктар жана белектер берилди.

——————————————

Turmush басылмасынын Баткен облусундагы кабарчысы Арзыгүл Галымбетова 2022-жылы 26-мартта көз жумган. Ал Баткен шаарында жерге берилген.

Арзыгүл Галымбетова 1984-жылы 24-ноябрда Баткен шаарында туулган.

2009-жылы К.Карасаев атындагы Бишкек гуманитардык университетинде журналистика жана информатика факультетин окуп бүтүргөн. Эмгек жолун 2007-жылы «Эхо Манас» телерадиокомпаниясында алып баруучу болуу менен баштаган.

2007-2008-жылдары «Кыргызстан обондору» радиостанциясында кабарчы жана радио алып баруучу болгон.

2008-2009-жылдары «КТР ОБО» гезитинде кабарчы болуп эмгектенген.

2010-жылдан бери АКИpress маалымат агенттигинде кабарчы, Баткен облусундагы өкүлү болчу.