Turmush — Баткен облусунун Кадамжай районунун Айдаркен шаарында суу тоңуп, шаарды таза суу менен камсыз кылууда көйгөй жаралды.

Шаар мэри Алтынбек Мурзажановдун маалыматы боюнча, учурда шаарда күнүгө 3-4 саат суу берилип, кайра токтотулуп жатат.

«Айдаркен тоолуу аймак болгондуктан аба ырайы абдан суук. Шаарды таза суу жана сугат суусу менен камсыз кылган Гавиан дарыясы тоңуп калууда. Аба ырайы күндүз -18 градустун -32 градуска чейин төмөндөп жатат. Дарыя башынан чыгып, музду жарып, суу айдап жатабыз. Ошентсе да кайра тоңуп жатат», — дейт ал.

Ошондой эле Баткен районунун Дара айыл өкмөтүнүн Кан айылында тоо тарабынан агып түшкөн Кожошкен дарыясынын баш жагы муз болуп тоңуп калды. Жергиликтүү тургундардын айтымында, акыркы 3-4 күндүн ичинде аба ырайы кескин төмөндөп кеткенине байланыштуу дарыянын агымы токтоп, тоңуп турат.

Кожошкен дарыясынын суусун негизинен Кадамжай, Баткен райондору жана кошуна Өзбекстан пайдаланат.