Turmush — Ысык-Көл районунун Чок-Тал айылындагы үйдө той өткөрүлүп, тамак-аштан массалык түрдө уулануу болду. Бул тууралуу Ысык- Көл район аралык ооруларды алдын алуу жана мамлекеттик санитардык эпидемиологиялык абалды көзөмөлдөө борборунун башкы дарыгери Алина Токтоназарова билдирди.

Маалыматка караганда, кечээ, 5-октябрь күнү Чок-Тал айылынын Кален көчөсүндөгү №1 үйдө той өткөрүлгөн. Бүгүн, 6-октябрь күнү саат 10:00 чамасында Чолпон-Ата шаардык аймактык ооруканасынын жугуштуу оорулар бөлүмүнөн 26 адам тамак-аштан уулангандыгы боюнча кабар түшкөн.

Жандандыруу бөлүмүнө 1 адам түшкөн. Балыкчы шаарындагы ооруканага 1 адам, Тоң районундагы ооруканага 1 адам кайрылган. Тойго Бишкек шаарынан 3 ашпозчу чакырылган. Алар медициналык кароодон өтүшкөн эмес.

Даярдалуучу азык-түлүктөр (тоок эти, майонез ж.б.) Бишкек шаарындагы “Дордой-Моторс ” базарынан сатылып алынган. Той түшкү саат 12:00дө башталып, кечки саат 17:00 чамасында аяктаган. Саат 17:00дөн 19:00гө чейинки аралыкта оорунун белгилери 2 адамда башталып, Чок-Тал айылдык ФАПка кайрылышкан. Бирок ФАПтын кызматкерлери тарабынан маани берилбегендиктен үйлөрүнө кетип калышкан.

Жабырлануучулардын айтымында, 5-октябрь күнү саат 20:00-21:00 чамасында дене табы көтөрүлүп, 4-5 жолу ичи өтүп, кусуп, алдары кеткен.

Саат 12:00гө чейин түшкөн бейтаптардын саны 9, алардын ичинен 1 жаштан өйдө 6 бала, калган 13 адам чоңдор. Баардыгынан ичеги-карын инфекциясына карата анализдер алынып, биринчи медициналык жардам көрсөтүлүп, антибиотик терапиясы башталды.

Бүгүнкү күндө жандандыруу жана жугуштуу оорулуулар бөлүмүнө түшкөн бейтаптардын акыбалы канааттандыраарлык. 26 адамдын ичинен 13 адам ооруканадан чыгарылды.