Turmush — Чүй облусунун Токмок шаарындагы көчөгө коюлган ылдамдыкты төмөндөтүүчү дөңсө талапка жооп бербей, жол кырсыктар болуп жатат. Бул тууралуу аймактык кабарчыга шаар тургундары билдиришти.

Алардын айтымында, 2023-жылдын 19-июнунда С.Ибраимов көчөсүнө ылдамдыкты төмөндөтүүчү дөңсө коюлган.

«Бирок ал талапка жооп бербей, бийик болуп калган. Мындан улам унаалардын алды тийип, ал тургай жол кырсыгы дагы болуп жатат», — деди алар.

Бул жагдай боюнча Коммуналдык ишканалар комбитаны түшүндүрмө берди.

«Мамлекеттер аралык стандарт боюнча, бийиктиги 7 сантиметрден ашпашы керек. Өзүңүздөр көргөндөй, аталган ылдамдыкты төмөндөтүүчү дөңсө деңгээл боюнча орнотулган. Муну менен катар унаа жолдун аталган тилкеси (түндүк-чыгыш бөлүгү) чөгүп кеткен. Ошондуктан бийик болуп калгандай көрүнүп жатат.

Буга карабастан, бүгүн тиешелүү адистер жеринде болуп, текшерүүдөн өткөрүштү. Жакынкы убакытта калыбына келтирүү иштери боюнча чара көрүлөт», — деп айтылат маалыматта.