Turmush — Кечээ, 20-сентябрда Ош шаарында милициянын кенже лейтенанты Нурланбек Сайдиевдин жаркын элесине арналган спорттук мелдеш башталды. Бул тууралуу Ош ШИИБдин басма сөз кызматы билдирди.

Милициянын кенже лейтенанты Сайдиев Нурланбек Жанышович 2004-жылдын 20-ноябрында террорчулар менен кармашууда курман болгон. 2006-жылдан баштап ИИМдин буйругунун негизинде жыл сайын анын элесине арналган мелдеш өткөрүлүп келет.

Кичи динамиадага ИИМдин «Шумкар» атайын багыттагы полкунун мамлекеттик адистештирилген күзөт башкармалыгынын кызматкерлери, Ички аскерлердин, Баткен ОИИБ, Жалал-Абад ОИИБ, Ош ОИИБ менен Ош ШИИБдин командалары катышып, спорттун 5 түрү боюнча күч сынап жатышат. Алар: ордо, аркан тартыш, кичи футбол, кол күрөш жана күжүрмөн куралдан ок аттуу.

Мелдеш эки күнгө созулат. Бүгүн, 21-сентябрда катышуучулар ок атуу боюнча мелдешип жатышат.

Ош шаардык ички иштер башкармалыгынын башчысы Марлис Асанов Нурлан Сайдиевдин ата-энесине ыраазычылык билдирди. Өз кезегинде маркумдун атасы уулунун атын өчүрбөй, ири иш-чараларды өткөрүп келе жаткан ИИМдин жетекчилигине ыраазычылык айтты. Ал эми ИИМдин «Динамо» коомдук бирикмесинин төрагасынын орун басары, милициянын отставкадагы полковниги Төрөкул Мадалиев мындай иш-чаралар жаш милиция кызматкерлерин патриоттуулукка, мекенин, кесибин сүйүүгө тарбиялай тургандыгын белгилеп өттү.

Спорттук иш-чаранын ачылышына Нурлан Сайдиевдин атасы, жубайы, уулу жана кызы катышты. Маркум эскерилип, куран окулду.