Turmush — Бүгүн, 7-апрелде «Талас» аэропортунун аэробекетинин жана аэродромунун курулуш иштери тууралуу маселе талкууланды. Бул тууралуу президенттин Талас облусундагы өкүлчүлүгүнүн басма сөз кызматы билдирди.

Иш-чарага президенттин Талас облусундагы ыйгарымдуу укуктуу өкүлү Нурлан Дарданов, «Манас» эл аралык аэрпортунун жетекчиси Манасбек Самудинов жана Талас шаарынын мэри Аскар Шабданов катышты.

Манасбек Самидинов: «Манас» эл аралык аэропорту Кыргыз Республикасынын Транспорт жана коммуникациялар министирлиги менен биргеликте асфальт-бетон төшөлгөн элементтердин андан аркы оңдоо-калыбына келтирүү иштерин өткөрүп берүүнүн жол-жобосун иштеп чыгууда. Мындан сырткары «Талас» аэропортунун аэродромунун учуп-конуу тилкеси, рулеждук жолчосу жана перрондорду оңдоп-түзөө пландалууда. Аткарылып жаткан иштер мамлекеттин пайдасына каражаттарды үнөмдөө максатында жасалууда», — деди ал.

Ошондой эле жолугушуу учурунда «Манас» эл аралык аэропортунун инфраструктура жана региондук өнүктүрүү боюнча директору Алтынбек Мамбетов бүгүнкү күндө Талас аэропортунун жаңы имаратынын курулушунун долбоордук-сметалык иш-кагаздары аяктоо этабында экенин айтты.

«Талас» аэропорту ишке берилсе, саатына 100 жүргүнчүнү кабыл ала турганга шарт түзүлөт. Долбоорду ишке ашыруу мөөнөтү 2023-жылдын 3-4-кварталына белгиленген.

Буга чейин, 2019-жылы «Манас» эл аралык аэропорту» ачык акционердик коомунун өз күчү менен «Талас» аэропортунун аймагын тосуп-курчоо боюнча курулуш-монтаждоо иштери аткарылды», — деди ал.

Буга чейин Кыргыз Республикасынын президенти Садыр Жапаров 11-мартта Нарын облусуна жасаган иш сапарынын алкагында «Нарын» аэропортунун реконструкциялоо иштери менен таанышып, эмдиги жылдан баштап ички аба каттамдар жанданарын, «Казарман», «Кербен», «Талас», «Каракол», «Нарын» аэропорттору оңдолорун айткан.