Turmush — Бүгүн, 8-сентябрь күнү Түп районунун жаңы дайындалган акими Шергазы Мурзахмедов жамаатка тааныштырылып, кызматка киришти. Бул тууралуу аймактык кабарчы билдирди.

Президенттин Ысык-Көл облусундагы ыйгарым укуктуу өкүлү Илияз Иманбетов райондогу мекеме-ишканалардын өкүлдөрүнө президенттин токтомун тааныштырып, Түп районунун мамлекеттик администрациясынын башчысы — аким Шергазы Мурзахмедовдун иштерине ийгилик каалады.

Шергазы Мурзахмедов президент Садыр Жапаровдун жарлыгына ылайык, 2023-жылдын 7-сентябрында Ысык-Көл облусунун Түп районунун мамлекеттик администрациясынын башчысы — аким болуп дайындалган.

Мурзахмедов Шергазы Мураталиевич 1981-жылы 20-февралда Жалал-Абад облусунун Сузак районунда Кара-Дарыя айылында туулган. Үй-бүлөлүү, 3 баланын атасы.

Ал буга чейин Айыл чарба министрлигине караштуу Жер ресурстары кызматынын «Кадастр» мамлекеттик мекемесинин директорунун орун басары болуп эмгектенген.