Turmush — Чүй облусунун Москва районундагы мал базарда 3 жаштагы гиссар тукумундагы кочкор 70 миң сомго суралды, деп билдирет аймактык кабарчы.

Ар жуманын жекшемби күнү райондун борбору Беловодск айылында мал базар өтүлөт.

Бүгүн, 6-январда өткөн жумаларга караганда гиссар тукумундагы кочкорлор сатыкка көп коюлду.

«Мал базар күндөрү үйдө багылган гиссар кочкорлорумду сатыкка коём. 1-2 жаштагы кочкорлорду дүңүнөн эле 30 миң сомдон сурап жатам. Бул кочкорлорго кошулган койлор 5 ай 5 күндөн кийин төл бере баштайт», — дейт Беловодск айылынын тургуну.

Ал эми Петровка айылынын тургуну төмөнкүлөргө токтолду.

«Гиссар кочкорум 3 жаштан өттү. Эттүү жана салмактуу. Мен аны 1 жашында сатып алгам. 2 жыл койлорума коштум. Эми 70 миң сомго сатам», — дейт ал.

Беловодск айылындагы мал базарда эттүү койлор 15-25 миң сом, козулар 8-10 миң сом, уйлар 80 миң сомдон ашуун баада суралууда.