Turmush — Талас шаардык соту жеңесине ызы-чуу салган адамга карата 2024-жылдын 26-февралында өкүм чыгарды. Turmush басылмасы окуянын чоо-жайын баяндайт.

• Айыпталуу Аратай (аты өзгөртүлдү М.А.) Кыргыз Республикасынын жараны. Убактылуу иштебейт, Талас шаарынын тургуну. Ага Укук бузуулар жөнүндөгү кодексинин 70-беренеси (үй-бүлөлүк зомбулук) менен айып тагылган.

Аратай 2024-жылдын 25-февралында саат 20:00 чамасында Талас шаарындагы үйүнө мас болуп келип, ызы-чуу салып, жеңеси Алчагүлдү (аты өзгөртүлдү А.Р.) оозго алгыс сөздөр менен сөгүп, «өлтүрөм» деп коркуткан. Үйгө милиция кызматкерлери чакырылып, алар Аратайды саат 22:40та кармашкан.

Сотто Аратай күнөөсүн мойнуна алып, соттон жеңил жаза берүүнү суранды. Ал эми жеңеси Алчагүл айыпталуучу Аратай 25-февралда саат 20:00 чамасында мас абалында үйгө келип, аны эч себепсиз сөгүп, ызы-чуу салып, тынчтык бербегендигин айтып, ага мыйзам чегинде жазасын берүүнү өтүндү. Прокурор болсо Аратайды 5 суткага камакка алуу жаза чарасын тандап берүүнү суранды.

Талас шаардык соту иштин материалдарын карап чыгып, Аратайды Укук бузуулар жөнүндө кодексинин 70-беренеси (үй-бүлөлүк зомбулук) менен күнөөлүү деп таап, 40 саатка коомдук иштерге тартуу жазасын берди.

• Иштин материалдары Жогорку соттун сайтындагы соттук чечимдердин жана актылардын маалыматтар базасында жарыяланды.