Turmush — Чаткал районуна караштуу Ак-Таш айылында 15-февралдан бери 1 метр 40 сантиметр кар жаады. Ал эми кыш мезгилинен берки кардын калыңдыгын кошкондо 2 метр 40 сантиметрге жеткенин жергиликтүүлөр аймактык кабарчыга билдиришти.

Жашоочулардын айтымында, учурда айылда кар жаап жатат.

«Бүгүн эле айылдын балдары биригип, кардын калыңдыгын атайын өлчөдүк. 2 метр 40 сантиметр чыкты. Бул кар жаап, кайра басаңдап калгандагы өлчөмү десек болот. Биздин айыл башка бир да айыл менен байланышпайт. Бир гана район менен байланыштырчу жолубуз 15-февралдан бери жабык турат. Кар көчкү бар. Айылдын ички жолу сүрүлгөн, айылдагы ФАП иштеп жатат. Бүгүн өчкөн электр жарыгы кечинде берилет деп жатышат», — дешет айылдыктар.

Айылдын жаштары жардамга муктаж жарандардын короосун, үйүнүн чатырын кардан тазалоого жардам берип жатышат.

Чаткал районунун акими Алтынбек Сеңирбаевдин маалыматы боюнча, Ак-Таш айылына барчу Красная Горка—Ак-Таш жолу 15-февралда анын буйругу менен жабылган. Бул жолдо кар көчкү кооптуулугу бар.

«Жалал-Абад электр тармактары» мекемеси Ак-Таш айылындагы электр монтерлор текшерүү жумуштарын жүргүзүп жатканын, кошумча бригада Ак-Ташка баруучу жолдо тынбай кар көчкү түшүп, кооптуулук жаралгандыктан өтө албай жатканын маалымдады.