Turmush — Жалал-Абад шаарында жумушсуз жарандарга иш берүүчүлөр тарабынан 300дөн ашык бош орун сунушталды. Бул тууралуу Жалал-Абад шаардык эмгек, социалдык камсыздоо жана миграция башкармалыгынын башчысы Назира Жакыпова билдирди.

Анын айтымында, бош жумуш орундар жармаңкесине калаа жетекчилигинен өкүлдөр, мекеме-ишканалардын жетекчилери, жумуш берүүчүлөр жана жумушсуз жарандар катышты.

«Жылына 2 ирет бош жумуш орундар жармаңкесин өткөрүп турабыз. Мында жумуш берүүчүлөр менен ишсиз жүргөн жарандар бир аянтчада жолугуп, ваканциялар тууралуу маалыматтар айтылат. Бүгүнкү иш-чарага негизинен ЖОЖдордун бүтүрүүчүлөрү катышты. Иш-чарада жалпы 300дөн ашык ваканция сунушталды. Акыркы мезгилде биз эки жолу уюштуруудан сырткары социалдык тармактарда атайын тайпаларда муктаждык жаралган кесип ээлери же бош орундар тууралуу маалымат берип жатабыз», — деди ал.

Аталган башкармалыктын маалыматына караганда, 2024-жылдын апрель айына карата Жалал-Абад шаарында 1159 адам жумушсуз катары каттоодо турат.