Turmush — Бишкек—Ош жолундагы кырсыктан 17 жаштагы айдоочу каза болду. Бул тууралуу Turmush басылмасына окуянын күбөлөрү билдирди.

Маалым болгондой, жол кырсыгы 17-декабрда аталган жолдун Кочкор-Ата шаарындагы тилкесинде орун алган.

«Кечээ эртең менен Бишкек—Ош унаа жолунда Бишкектен Ош шаарын көздөй бара жаткан ВАЗ-2107 «Жигули» үлгүсүндөгү унаанын айдоочусу башкарууну жоготуп, жол четиндеги бетон мамыны сүзүп токтоптур. Унаанын ичинде 4 адам бар экен. 2006-жылы туулган айдоочу жигит окуя болгон жерде мерт кетиптир. Калган 3 жүргүнчү тез жардам менен ооруканага жеткирилди», — деди окуянын күбөсү.

Кочкор-Ата шаардык жалпы дарыгерлер практикалык борборунун башкы дарыгери Айжамила Мамасадыкова ушул тапта бейтаптардын абалы туруктуу экенин айтат.

«Тез жардам унаасы менен 3 бейтап жана 1 жансыз дене алынып келинди. Алардын баары Ноокен районунун Ноокен айылынын 2006-жылы туулган тургундары экен. Жараат алган бейтаптардын баары хирургия бөлүмүнө жаткырылды. Алардын абалы туруктуу», — деди ал.