Turmush — Нарын облусунун Ак-Талаа районундагы Баетов—Кош-Дөбө унаа жолуна асфальт төшөө иштери башталды. Бул тууралуу аймактык кабарчы билдирди.

Маалыматка караганда, тамтыгы чыккан жол көп жылдардан бери ак-талаалыктардын эң олуттуу көйгөйлөрүнүн бири болуп келген.

Ак-Талаа райондук №15 жол тейлөө ишканасынын башчысы Максат Орозалиевдин айтымында, быйылкы жылы Ак-Тал—Чат—Казарман унаа жолунан, тактап айтканда Тайлак-Бейит чөлкөмүнөн Ак-Кыя айылын көздөй кеткен унаа жолдун 1 чакырымына, Нарын—Баетов унаа жолунун Үгүт жана Байгөнчөк айылынын ортосунан 1 чакырым жолго асфальт басылып бүткөн. Ушул эле Нарын—Баетов унаа жолунун, тактап айтканда Байгөнчөк жана Баетов айылынын ортосундагы унаа жолдун 4 чакырымына асфальт төшөө иштери башталган. Учурда эски асфальтты сыйруу иштери жүрүп жатат. Мындан тышкары, Баетов—Кош-Дөбө унаа жолунун 10 чакырымына асфальт төшөө иштери башталды.