Turmush — Жалал-Абад шаарында аз камсыз болгон 75 үй-бүлөгө 100 миң сомдон берилди, деп билдирет аймактык кабарчы.

Бүгүн, 15-апрель күнү «Социалдык келишим» долбоорунун алкагында шаардагы аз камсыз болгон үй-бүлөлөргө сертификат берүү иш-чарасына Эмгек, социалдык камсыздоо жана миграция министринин орун басар Жаңыл Алыбаева, Жалал-Абад шаарынын мэри Эрнисбек Ормоков, шаардык кеңештин төрагасы Нуртилек Орозбаев катышты.

«Социалдык келишим» долбоорунун максаты — аз камсыз болгон үй-бүлөлөрдү оор турмуштук кырдаалдан чыгарууга түрткү берүү жана эмгекке тартуу менен жашоо сапатын жакшыртуу болуп саналат.

Кайтарымсыз негизде 100 миң сомдон алган үй-бүлөлөр бул каражатка ишкердик баштайт.

Өткөн жылы социалдык келишимдин негизинде 50 үй-бүлөгө 100 миң сомдон берилген. Бүгүн алар өндүргөн продукциялардын көргөзмөсү да орун алды.