Turmush — Талас шаарында мыйзамсыз сакталган курал алынды. Бул тууралуу Талас ОИИБдин басма сөз кызматы билдирди.

Маалыматка ылайык, милицияга Талас шаарынын ​Турдалиев көчөсүндө жайгашкан «Ак-Жар» мончосунун жанындагы автоунаада мыйзамсыз ​курал-жарак бар деген​ билдирүү келип түшкөн.

Аталган билдирүү Талас ШИИБдин маалыматтарды эсепке алуу электрондук журналына ​ катталып, тергөөгө чейинки текшерүү иши башталган.

Ыкчам иш-чаралардын жүрүшүндө «Фольксваген Венто» үлгүсүндөгү унаадан сайлуу ок атуучу курал жана ок-дарылар табылган.

Алдын ала текшерүү учурунда Талас шаарынын ​1986-жылы туулган М.У. сайлуу ок атуучу куралын жана 46 даана ок-дарыны өзү менен тең​ К. уулу А.га сатып жаткандыгы аныкталган.

Бул факт боюнча Кылмыш-жаза кодексинин 267-беренеси (куралды, ок-дарыларды мыйзамсыз жүгүртүү) менен кылмыш иши козголуп, тергөө иштери жүрүп жатат.