Turmush — Ош шаарында чет элдик жарандарды тоноп кеткен шектүү кармалды. Бул тууралуу бүгүн, 13-апрелде ШИИБдин басма сөз кызматы билдирди.

Маалыматка караганда, буга чейин Ош шаардык ички иштер башкармалыгына чет элдик 5 жарандан арыз келип түшкөн. Арыздарда жабырлануучулар өздөрүнө таандык болгон уюлдук телефондорун, акчаларын азият түспөлүндөгү 20-25 жаштагы белгисиз жаран тоноп кеткендигин билдиришкен. Аталган факт Кылмыш-жаза кодексинин 206-беренеси (тоноо) менен катталып, тергөө кызматы тарабынан шектүүнү кармоо үчүн атайын тапшырмалар берилген.

Сулайман-Тоо милиция бөлүмүнүн кызматкерлери тарабынан жүргүзүлгөн ыкчам иш-чаралардын жыйынтыгында кечээ, 12-апрелде кылмышка шектүү катары Ош облусунун Өзгөн районунун 2002-жылы туулган тургуну А.А кармалып, убактылуу кармоочу жайга киргизилди.