Turmush — Ош облусунун аймагында уруксат берилбеген жерлерге жарнама илген 11 жаранга 33 миң айып пул салынды. Бул тууралуу Ош облустук жол кыймылынын коопсуздугун камсыздоо бөлүмүнөн билдиришти.

«Автомобил жолдору жөнүндө» мыйзамдын жана «Кыргыз Республикасынын мамлекеттик тили жөнүндөгү» мыйзамынын талаптарын аткаруу боюнча Ош облустук жол кыймылынын коопсуздугун камсыздоо бөлүмүнүн жол кыймылын көзөмөлдөө тобунун кызматкерлери тарабынан 13-16-март күндөрү Ош облусунун аймагында «Жарнак такта» аталыштагы рейддик иш-чара өттү. Иш-чара Ош облусундагы унаа жолдордун жээгинде тиешелүү органдар менен макулдашбастан жарнак такталарын, паннолорду, иш транспаранттарды, көрнөктөрдү, плакаттарды, афишаларды, белгилерди, көрсөткүчтөрдү жана башка ушундай өз билемдик менен орнотуп алган фактыларын аныктоо максатында уюштурулду.

Рейддин жүрүшүндө Укук бузуулар жөнүндө кодекстин 179-беренесинин (автомобиль жолдорунун бөлүү тилкесин сактоо эрежелерин бузуу) негизинде 11 жаранга карата протоколдор түзүлүп, ар бирине 3 миң сомдон айып пул салынды.

Учурда мындай иш-чаралар Ош облусунун бардык райондорунда уюштурулуп өткөрүлүүдө.