Turmush — Ысык-Көл облустук сотунун соттук коллегиясы Балыкчы шаарында пенсионердин өлүмү боюнча козголгон кылмыш иши боюнча чыгарылган чечимди күчүндө калтырды.
Буга чейин Turmush басылмасы үч адам дарыкананы тоноп кетишкенин жазган. Пенсионерге кол салуу болуп, ал каза тапкан. Үчөө тең соттолуп, шаардык сот өкүм чыгарган.
Соттолуучулардын бири — Б.Алексей 1982-жылы 25-октябрда Чүй облусунун Кемин районунда туулган. 9-класска чейин окуган. Үй-бүлөлүү, жумушсуз, мурда адам өлтүрүү, уурулук, тоноо жана убактылуу кармоочу жайдан качуу боюнча кылмыш иши козголгон.
Бул жолу ага Кылмыш-жаза кодексинин 253-беренесинин 1,2-бөлүмүнүн («Куралды, ок-дарыларды мыйзамсыз жүгүртүү») жана 130-беренесинин 2-бөлүгүнүн 2.7.14-пункту («Киши өлтүрүү») боюнча кылмыш иши козголгон.
Иштин материалдарына ылайык, Алексей өлтүрүлгөн адам анын агасы экенин көрсөткөн.
2020-жылдын 13-февралында калаа тургуну М.Михаилдин жансыз денеси өз үйүндө табылган. 2020-жылдын 5-мартында Алексей милицияга күнөөсүн моюнга алуу менен келген. Анын айтымында, 10-февраль күнү Дамир жана Майрамбек менен бирге оңой акча алуу максатында кечки саат 21:00 чамасында үчөө Михаилдин үйүнө барышып, тосмодон секирип, эшигин такылдата башташкан. Ал эшикти ачканда, Алексей аны тээп, дароо муунта баштаган. Михаил эсин жоготкондон кийин кол салгандар үйдү тинтүүгө киришкен. Бир аздан кийин Михаил өзүнө келген. Бирок тергөө аныктагандай, Алексей анын артынан келип, муунтуп өлтүргөн. Андан соң аталган жарандар үйдөн 1 тигүүчү машина, 4 литр өсүмдүк майы, бир нече бөтөлкө арак, 16-калибрдеги эки мылтык, кара бүктөлүүчү бычак, кир самын алып, окуя болгон жерден из жашырып кетишкен.
Жүргүзүлгөн иликтөө иштеринин алкагында Майрамбектин үйүндө тинтүү жүргүзүлүп, үйдүн дарбазасынын адында көмүлгөн аңчылык мылтыгы, 19 гильза, 1 таңгак ок атуучу курал, 1 таңгак мылтыктын дүрмөтү жана 1 таңгак пистон (патрондогу дарыны тутандыруучу жарылгыч составы бар кичинекей калпакча) табылган.
Суралган айыпталуучу Алексей соттук отурумда күнөөсүн жарым-жартылай мойнуна алып, 2020-жылдын 20-январында Дамир анын үйүнө келип, кошумча жумуш издеп жаткандыгын айткан. Алексей ага жумуш жок экендигин айткан соң, Дамир жаңы варианттардын карай баштаган.
Андан соң Алексей пенсия алып, көп коротпогондуктан, акчасы бар деп, жалгыз жашаган чалга барууну сунуштаган. Буга Дамир макул болуп, аны тоноону чечишкен. Алар чалды тоноону пландаштырып жатышканда, Михаил иттери менен сыртка чыккан. Көп өтпөй пландаган кылмышын жүзөгө ашырышкан. Бирок Алексей чалды өлтүрбөгөнүн айткан.
Анын айтымында, маркумду иттер тиштеп алышы мүмкүн. Андан соң Майрамбек мылтыктын бир бөлүгүн араа менен кесип алып, аны менен Бишкек шаарына тоноого барган. Ал дүкөндү тоноп жаткан жеринен кармалган.
Окуянын күбөсү ал Михаил менен кошуна жашаганын айтты. Анын үй-бүлөсү жана жакындары болгон эмес. Ал 10го жакын ит менен жашаган. 2020-жылдын февраль айынын башында почточу пенсия алып келгенде, Михаил үйүнөн чыккан эмес. Анан ал почточу менен бирге Михаилдин эшигин такылдатканда, эшикти ачкан эмес. Аял уктап жаткан уулун ойготуп, кошунасына баруусун суранган. Уулу барып, кайтып келип, Михаил иттердин курчоосунда өлүп жатканын айткан.
Маркумдун бетин иттер кемирип салышкан. Андан кийин алар милицияны чакырышкан. Милиция кызматкерлери келишип, иттерди атып, жансыз денени өлүкканага алып кетишкен.
Жыйынтыгында 2021-жылдын 24-февралында Балыкчы шаардык соту (судья М.Дюшембиев) пенсионерди өлтүргөн деп Алексейди 13 жылга эркинен ажыраткан.
Дамир киши өлтүрүүгө шериктеш болгон, уурулук жана курал-жарак сактоо боюнча күнөөлүү деп табылды. Сот аны 15 жылга эркинен ажыратып, 50 миң сом айыпка жыкты.
Майрамбек уурулук жана адам өлтүрүүгө шериктеш болгон деп айыпталып, 13 жылга эркинен ажыратылып, 20 миң сом айыпка жыгылган.
- Жыйынтыгында Ысык-Көл облустук сотунун соттук коллегиясы шаардык соттун чечимин күчүндө калтырды.
