Turmush — Чүй облусунун Кемин районуна жыйырмадан ашуун баткендик тургундар жайгашты. Бул тууралуу аймактык кабарчыга райондук мамлекеттик администрациясынан билдиришти.

Маалыматка ылайык, башында 14 киши келген. Анын ичинен 4 чоӊ киши, 1 студент, калганы жаш балдар. Анын ичинен кечээ 2 келин балдары менен 9 киши кеткен. Андан кийин 11 киши, тактап айтканда 5 аял, 6 баласы менен келди.

«Түндө дагы кемпир-чал келишти. Азыр дагы жолдо 4 киши келе жатат. Биз аларды Кара-Булак айыл өкмөтүнүн Алтымыш айылындагы №19 кесиптик лицейинин жатаканасына жайгаштырып, бардык шарттар түзүп бердик.

Учурда мектеп курактагы 3 бала бар. Аларга Алтымыш негизги мектеби менен тааныштыруу уюштурулду. Бөбөктөргө райондук билим берүү бөлүмүнүн кызматкерлери, мектеп жамаатынын атынан чакан кече жана таттуулар тартууланып, ысык чай уюштурулду. Алтымыш негизги мектебинин 8-классынын окуучусу Үсөнбеков Жаныбектин демилгеси менен «Баткен элине жардам» кутучасы уюштурулуп, окуучулар өз жардамдарын беришти. Мектеп окуучулары үчүн Кара-Булак айыл өкмөтү тарабынан окуу куралдары, кийим-кече жана башкалар алынып берилет», — деп айтылат маалыматта.