Turmush — Ош облусунун Кара-Суу районунда 43 жаштагы аялды унаа менен сүзүп, качып кеткен айдоочу кармалды.

Ош облустук жол кыймылынын коопсуздугун камсыздоо бөлүмүнүн маалыматы боюнча, кырсык 23-март күнү саат 11:40 чамасында Кара-Суу районунун Отуз-Адыр айылында болгон. Белгисиз үлгүдөгү унаа жолдон өтүп бара жаткан жөө жүрүүчү — Кара-Суу шаарынын 1980-жылы туулган тургуну О.В.ны сүзүп, айдоочу окуя болгон жерден белгисиз тарапка изин жашырган. Анын кесепетинен жөө жүрүүчү денесинен жаракат алып, Кара-Суу райондук ооруканасына жеткирилген.

Көрүлгөн ыкчам аракеттердин натыйжасында жол кырсык болгон жерден качып кеткен айдоочу — Кара-Суу районунун 1958-жылы туулган тургуну С.А. «ВАЗ-2107» үлгүсүндөгү автоунаасы менен 2023-жылдын 27-март күнү Кара-Суу районунун аймагынан Кара-Суу райондук жол кыймылынын коопсуздугун камсыздоо бөлүмчөсүнүн издөө боюнча инспектору Каныбек Аккаров жана Ош ОИИБдин кызматкери Нурсултан Садиридин уулу тарабынан кармалды. Айдоочу Кара-Суу РИИБдин тергөө кызматына жеткирилип, автоунаа убактылуу айып короого токтотулду.

Бул жол кырсык Кара-Суу РИИБдин тергөө кызматы тарабынан Кылмыштардын бирдиктүү реестрине катталып, тийиштүү экпертизалар дайындалды. Учурда тергөө иштери жүргүзүлүүдө.