Turmush — Кечээ, 16-мартта Чүй облусунун Кара-Балта шаарындагы тургундар кышты узатып, жазды тосуп алышты.

Turmush басылмасынын кабарчысы билдиргендей, Ленин атындагы маданият үйүнүн аянтында Масленица майрамы белгиленди. Масленица бир жумага созулуп, майрамдык иш-чара менен жыйынтыкталды.

Аянтта жармаңке уюштурулуп, кол өнөрчүлөрдүн эмгектери көргөзмөгө коюлду. Тургундарды Владимир Белкиндин жетекчилигиндеги «Казачья песня» элдик ансамбли куттуктады.

Иш-чарада алдын ала даярдалган кыштын кеби (чучела) өрттөлдү. Майрамдык иш-чарага келгендердин айтымында, бул кеп Кыргызстандагы эң чоң кеп болду. Анын бийиктиги 6 метрге жетет. Ал эми колу 3 метр болсо, салмагы 200 килограммдан ашат. Аны даярдоого 10 түк саман жана 20 метр кездеме керектелди. Кепти өрттөө кыш, суук менен коштошуу дегенди түшүндүрөт.