Turmush — Ысык-Көл облусунун Ак-Суу районуна караштуу Жолголот айылында фельдшердик-акушердик пункт жана бала бакча ишке берилди. Бул тууралуу аймактык кабарчы билдирди.

Маалыматка караганда, салтанаттуу иш-чарага президенттин Ысык-Көл облусундагы ыйгарым укуктуу өкүлүнүн орун басары Улан Далиев, Ак-Суу районунун акими Мунарбек Насиров, жергиликтүү бийлик өкүлдөрү жана айыл тургундары катышты.

Жолголот айылында жалпы 2873 адам жашайт. ФАП жана бала бакча элеттиктердин негизги көйгөйү болуп келген. Анткени 1976-жылы курулган эмкана авариялык абалда. 2022-жылдын жаз айында коомдук фонддордун демөөрчүлүгү менен 3,8 млн сомго жаңы курулду.

1990-жылы бала бакчанын 2 кабаттуу имараты курулуп бүтпөй калган. 2008-жылы спорт зал жана компьютердик класс ачылган. Айыл элинин өтүнүчү менен имарат реконструкцияланып, 120 балага ылайыкташкан бала бакча болуп пайдаланууга берилди.