Turmush — Ысык-Көл облусунун Тоң районуна караштуу Төрт-Күл айылында «Эрте никеге каршыбыз» деген ураандын алкагында кыз-келиндер арасында волейбол оюну боюнча мелдеш болуп өттү. Бул тууралуу аймактык кабарчы билдирди.

Маалыматка караганда, мелдешке 18 жаштан 35 жашка чейинки жана андан жогору курактагы 6 команда катышып, кызыктуу оюн көрсөтө алышты. Эң жаш оюнчу 18 жаштагы кыз болсо, эң улуусу 62 жаштагы Төлөн Жумаева болду.

Жыйынтыгында 18-35 жаш курактагылар арасында 1-орунга «Билим» командасы татыса, 2-орунду «Алга» командасы багындырды. Ал эми 3-орунду «Бийиктик» командасы камсыздады. 35 жаштан жогорку курактагылар арасында 1-орунга «Ынтымак» командасы, 2-орунга «Айылдык ден соолук» комитетинин командасы, 3-орунга «Жаштык» командасы ээ болду. Олжолуу орунга илинген командалар диплом жана кызыктыруучу белектер менен сыйланышты.

Кыз-келиндер арасында өткөрүлгөн волейбол оюну «Гендердик маалымат борбору» ассоциациясы тарабынан каржыланып, Төрт-Күл айылдык кеңешинин депутаты Гүлай Абдыкадырова уюштурду.

Мелдешти өткрүүнүн максаты — айымдардын ден соолугун чыңдоо, аларды спорт менен дос болууга үндөө жана кыздардын эрте турмушка чыгуусун алдын алуу.