Turmush — Ысык-Көл облусунун Түп районунда жайгашкан Кайкин атындагы №7 орто мектебинде СПИД илдетин алдын алуу максатында «Теңдик үчүн убакыт келди» аталышындагы акция болуп өттү. Бул тууралуу аймактык кабарчы билдирди.

Маалыматка караганда, район боюнча 9 мектептен тандалып алынган окуучулар саламдашуу, эмблема, плакаттарды жактоо, суроо-жооп викторинасы, чакан сценкалар жана флешмоб боюнча сынактарга катышышты.

Жыйынтыгында 1-орунду 93 упай топтогон Т.Шевченко атындагы Михайловка мектеби, 2-орунду 92 упай менен Ж.Мукамбаев атындагы Күрмөнтү мектеби, 3-орунду 91 упай менен К.Үсөнбеков атындагы Кудургу мектеби, 4-орунду 89 упай алган Ж.Ашымов атындагы Арал мектебинин окуучулары ээлешти.

Акциянын катышуучулары «Зомбулуксуз 16 күн» менен «Теңдик үчүн убакыт келди» деген жазуудагы плакаттарды көтөрүп, жөө жүрүшкө да чыгышты.