Turmush — Ош шаарында милициянын кайгуул кызматкерлери адам өмүрүн сактап калышты. Бул тууралуу Ош ОИИБдин басма сөз кызматынан билдиришти.

Маалыматка караганда, 9-июль күнү саат 15:00 чамасында «102» номуруна кабар келип түшкөн. Анда Ош шаарынын Т.Кулатов кичи шаарчасынын тургуну (аял киши) өзү жашаган көп кабаттуу үйдүн 5-кабатынан секирүүгө аракет кылып жатканы айтылган.

Ош шаардык ички иштер башкармалыгы боюнча милициянын кайгуул кызматынан билдиришкендей, окуя болгон жерге үч кайгуул кызматкери барып, аялды куткарып калышкан.

«Окуя болгон жерге милициянын капитаны Р.Жаанбаев, милициянын страшинасы Н.Сейитбеков жана милициянын кенже сержанты Абдиманап уулу Б. барышкан.

Милициянын кайгуул кызматкерлери үйдүн төмөн жагынан аялды алаксытып, кепке тартып турса, бир кызматкер бешинчи кабаттагы батирге кирип, аялды куткарып калууга үлгүргөн. Ал 31 жаштагы аял болгон. Милициянын кайгуул кызматкерлери аны жакындарына өткөрүп беришти», — деп айтылат маалыматта.