Turmush — Ош шаарындагы «Ифтар базар» жабылды. Бул тууралуу шаардык мэриядан билдиришти.

Маалыматка караганда, базардын жабылышына санитардык талаптар сакталбаганы себеп болгон. Базар кечээ, 14-мартта Ош шаардык муниципалдык менчик башкармалыгы тарабынан жабылды.

«Анткени тамак-аштар санитардык талаптарга жооп бербейт, тез бузулуучу тамактар сатылган. Муну менен катар жол тыгыны пайда болуп, ыңгайсыздык жаралган», — деп айтылат маалыматта.

Буга чейин Turmush Ош шаарындагы «Ифтар базар» Орозо айынын биринчи күнүнөн тарта иштеп баштаганын жазган. Бул базар Курманжан датка, Рысбай Абдыкадыров, 8-март көчөлөрүндө бир жылда бир жолу, тактап айтканда 30 күн иштейт.

Орозо айы быйыл 11-мартта башталды.

Turmush басылмасынын кабарчысы билдиргендей, базарда орозодо ден соолукка пайдалуу делген даяр тамак-аштар, жашылча-жемиштер, салаттар, нандын өзгөчө түрлөрүнөн тартып таттууларга чейин сатыкка чыгат. Аларды жергиликтүүлөр үй шартында өздөрү жасашат.

2022-жылы аталган базар санитардык талаптарга жооп бербейт деген жүйө менен жабылган болчу. Буга чейин Санитардык-эпидемиологиялык көзөмөл кызматы санитардык абалдарды сактоо боюнча эскертүү берген.