Turmush — Бүгүн, 2-февралда кыргыз-тажик чек арасы боюнча эки тараптуу сүйлөшүү өттү.

Чек ара маселеси боюнча КРдин президентинин Баткен облусундагы ыйгарым укуктуу өкүлү Абдикарим Алимбаев Тажикстан Республикасынын Согди облусунун губернатору Раджобой Ахмадзода менен жолукту.

Тараптар 3 маселе боюнча макулдашышты:

— Чек ара аймактарындагы чечилбеген бардык маселелерди сүйлөшүү аркылуу чечүү;

— 2023-жыл ичинде биргелешкен иш-чараларды өткөрүү;

— Эки өлкөдө тең чек арада жашаган жашоочуларга түшүндүрүү иштерин жүргүзүү.

Бишкек жана Душанбе бир добуштан чек ара боюнча талаш маселелер тез арада чечилиши керек деп эсептешет.

Ошондой эле сүйлөшүүлөрдү быйылкы жылы аяктоону пландаштырууда.

Акыркы маалыматтар боюнча Кыргызстан менен Тажикстандын ортосундагы макулдашылган чек ара сызыгы болжол менен 625 чакырымды же 63 пайызды түзөт. Жалпысынан коңшу өлкөлөрдүн байланыш сызыгынын узундугу 980 чакырымды түзөт.