Turmush — Баткен районунда «2022-жылдын мугалими» сынагынын райондук туру өттү. Бул тууралуу акимичликтен кабарлашты.

Маалымат караганда, сынактын максаты — алдыңкы тажрыйбаны жайылтуу, мугалимдин ишмердүүлүгүн баалоо, жылдын мыкты мугалимин аныктоо, мугалимдерде активдүү педагогикалык позицияны калыптандыруу жана мугалимдик иштин баалуулугун даңазалоо. Март айында сынактын мектептик жана аймактык туру өткөрүлгөн. 9 айыл өкмөтүнөн жеңүүчү деп табылган мыктылар райондук турга катышты.

Сынак 2 этап менен өткөрүлүп жыйынтыгында 1-орунду ээлеген Дөбө орто мектебинин мугалими Бүайша Ураимова 1-даражадагы диплом, түстүү сыналгы менен сыйланып, «Жылдын мыкты мугалими» сынагынын облустук туруна жолдомо алды.

Ал эми Чек орто мектебинин мугалими Үсөн кызы Акмарал 2-орунду камсыз кылып, 2-даражадагы диплом, микро толкундуу меш утту. 3-орунду Чоң-Талаа орто мектебинин мугалими К.Маккамбаева ээлеп, 3-даражадагы диплом жана чаң соргуч менен сыйланды.

Ал эми бардык катышуучуларга кароо-сынакка активдүү катышкандыгы үчүн уюштуруучулардын ардак грамоталары жана баалуу сыйлыктары тапшырылды.

Ошондой эле, кесиптик бирликтин райондук комитети тарабынан Жалал-Абад эс алуу курортуна эс алууга акысыз жолдомо бериле турган болду.