Turmush — Жол кырсыктын кесепетинен Ысык-Көл район аралык ооруларды алдын алуу жана мамлекеттик санитардык-эпидемиологиялык абалды көзөмөлдөө борборунун башкы дарыгери Токтоназарова Алина Эсентуровна дүйнө салды.

Кырсыктын айынан анын 1973-жылы туулган жолдошу да акка моюн сунган.

• Маркумдарды акыркы сапарга узатуу зыйнаты эртең, 29-март күнү саат 12:00дө Балыкчы шаарында өткөрүлөт.

Turmush басылмасына маалым болгондой, Алина Токтоназарова 1972-жылы жарыкка келген. Эмгек жолун 1998-жылы санитардык агартуу бөлүмүндө санитардык дарыгер болуп иштөөдөн баштаган. 2003-жылдан тарта Ысык-Көл район аралык ооруларды алдын алуу жана мамлекеттик санитардык-эпидемиологиялык абалды көзөмөлдөө борборунда тамак-аш гигиенасы боюнча санитардык дарыгер кызматын аркалаган.

2009-жылы Ысык-Көл райондук оорулардын алдын алуу борборунда мамлекеттик санитардык-эпидемиологиялык көзөмөл бөлүмүнүн башчысы, 2010-жылы санитардык бөлүмдүн башчысы болуп иштеген.

2012-жылы Санитардык, ветеринардык жана фитосанитардык коопсуздук боюнча мамлекеттик инспекциясынын Бишкек шаардык инспекциясынын башкы санитардык көзөмөл адиси болуп дайындалган.

2013-жылы Ысык-Көл район аралык ооруларды алдын алуу жана мамлекеттик санитардык-эпидемиологиялык абалды көзөмөлдөө борборуна санитардык дарыгер болуп кайтып келген.

2021-жылы Ысык-Көл район аралык ооруларды алдын алуу жана мамлекеттик санитардык-эпидемиологиялык абалды көзөмөлдөө борборунун башкы дарыгери болуп дайындалган.

• Буга чейин Turmush басылмасы Ысык-Көл районунда жол кырсыгы катталып, жубайлар каза тапканын жазган.

Кечээ, 27-март күнү саат 13:27 чамасында Ысык-Көл районунун Чырпыкты айылында «Джак Рефайн» жана «Даймлер-Крайслер D312» үлгүсүндөгү унаалардын катышуусундагы жол кырсыгы катталган.

Ысык-Көл райондук ооруканасынын маалыматына караганда, тез жардам кызматына чакыруу саат 13:27де түшкөн. Кырсык орун алган жерге 2 тез жардам унаасы жөнөтүлгөн. Бир бейтап оор абалда ооруканага алып келинген. Ага жандандыруу бөлүмүндө медициналык жардам көрсөтүлгөн.

Биринчи унаада Ысык-Көл район аралык ооруларды алдын алуу жана мамлекеттик санитардык-эпидемиологиялык абалды көзөмөлдөө борборунун башкы дарыгери А.Т. (аял киши) жана жолдошу болгону айтылган.

Дарыгер жолдошу менен кырсык катталган жерде каза тапкан.

Экинчи унаадагы 3 жаран Балыкчы шаардык ооруканасына жеткирилген.

Аталган ооруканадан билдиришкендей, анда 1989-жылы туулган тургун (эркек киши) жана анын 2018-жылы туулган уулу болгон.

Абалдары туруктуу оор. Сөөктөрү сынып, баш мээсинде жаракаттар бар. Учурда жандандыруу бөлүмүндө жатышат.

Ата жана бала Чүй облусунун Ысык-Ата районунун тургундары экени айтылууда.

Жеринде иш алып барган жол кыймылынын коопсуздугун камсыздоо башкармалыгынын кызматкерлери бул окуя боюнча кийинчерээк маалымат берилерин кабарлашкан.