Turmush — Нарын облусунун Ат-Башы районунда кыш башталганын жергиликтүү тургундар билдирди.

Алардын айтымында, быйыл эрте суук түшкөн.

Түнкүсүн жана таң эрте абанын температурасы -25 градуска чейин төмөндөп, күндүз -10…-15 градуска чейин суук болууда.

Ат-Башы району ― Кыргызстандын Нарын облусунун түштүк бөлүгүндөгү административдик-аймактык бирдик. 1930-жылы уюшулган. Түштүк жана түштүк-чыгышынан Кытай, чыгышынан Ысык-Көл облусунун Жети-Өгүз, түндүгүнөн Нарын, түндүк-батышынан Ак-Талаа, батышынан Ош облусунун Өзгөн, Кара-Кулжа райондору менен чектешет. Аянты — 19,1 миң чарчы метр. Райондо 11 айыл өкмөтү, 19 кыштак бар. Борбору — Ат-Башы айылы.

Климаты кескин континенттик. Июлдун орточо температурасы дыйканчылык өрөөндөрүндө +12…+18°С, бийик тоолуу аймактарда (Ак-Сай, Арпа өрөөндөрүндө) +10…+15°С. Кышы суук, январдын орточо температурасы -18… -29°С. Ак-Сай өрөөнү — Орто Азиянын «суук уюлу» (абсолюттук минимум -53,6°С). Жылдык жаан-чачыны өрөөндөрдө 300-350 мм, тоолордо 400-450 мм. Кышы 5-8 айга созулуп, кар 20-30 см калыңдыкта түшөт.

Ат-Башы кырка тоосунда, Какшаал, Фергана тоо тизмектеринде, Арпа, Чатыр-Көл, Аксай өрөөндөрүндө (3000 метр бийиктиктен жогору) түбөлүк тоң жатат.