Turmush — Бүгүн, 6-апрель күнү Ысык-Көл облусунун Тоң районунда 7-апрель — Элдик революция күнүнө карата эскерүү иш-чарасы болуп өттү. Бул тууралуу аймактык кабарчы билдирди.

Маалыматка караганда, иш-чарага Апрель революциясынын катышуучулары, курман болгондордун үй-бүлөлөрү чакырылды. Шейит кеткендердин жаркын элесине багышталып Куран окутулуп, асманга ок атылып, эстеликке гүлчамбар коюлду.

Район жетекчилиги тарабынан «7-апрель — Элдик революциясына 10 жыл» юбилейлик медалы революциянын катышуучуларына тапшырылып, коогалаңда курман болгон жарандардын үй-бүлөлөрүнө акчалай жардам берилди. Иш-чаранын соңунда райондук маданият бөлүмүнүн кызматкерлери даярдаган спектакль тартууланды.