Turmush — Бүгүн, 16-майда Кызыл-Кыя ШИИБдин өздүк курамы кызмат учурунда каза болгон кызматкерлерди эскеришти. Бул тууралуу Баткен ОИИБдин басма сөз кызматы кабарлады.

Маалыматка караганда, алардын эстеликтерине гүл чамбарлар коюлуп, маркумдарга куран окутулду. Алардын үй-бүлөлөрүнө акчалай жардамдар берилди. Кызыл-Кыя шаарында ички иштер органдарында иштеп жүрүп 5 кызматкер кызмат учурунда каза болгон.

Алар:

— Милициянын лейтенанты Тойчиев Баатырбек Пазылович 29 жашында кылмышкердин бычагынан курман болгон;

— Милициянын ага лейтенанты Илязов Джалалидин Илязович 43 жашында иш ордунда жүрөк оорусунан каза болгон;

— Милициянын старшинасы Ысманов Кылычбек Илязович 31 жашында кылмышкердин огунан курман болгон;

— Милициянын сержанты Бердалиев Гуламжан Абдумуталипович 27 жашында кылмышкердин огунан көз жумган;

— Милициянын ага лейтенанты Тургунбаев Нургазы Сайдалиевич 25 жашында жол кырсыгынан каза болгон.

Бул кызматкерлердин элесин өчүрбөй атын түбөлүк сактоо үчүн алардын атынан көчөлөр аталып, эстеликтер коюлган.