Turmush — Кечээ, 30-майда Кыргызстандын Чүй облусу менен Казакстандын Жамбыл облусу чектешкен аймакта эки өлкөнүн биргелешкен өрт-тактикалык машыгуусу өткөрүлдү. Бул тууралуу аймактык кабарчыга президенттин Чүй облусундагы өкүлчүлүгүнөн билдиришти.

Иш-чара эки өлкөнүн чектеш аймактарында өрт кырсыгы катталган учурда эки өлкөнүн күч-каражаттары бирдиктүү тилсиз жоонун кесепеттерин жоюу максатында уюштурулду.

Атайын түзүлгөн сценарийге ылайык, токойдон чыккан өрттүн жалыны Кыргызстандын аймагындагы май куюучу жайга өтүп, андан ары жол тейлөө мекемесинин айланасындагы бак-дарактарды каптайт.

Ири өрттү өчүрүүгө Өзгөчө кырдаалдар министрлигинин Чүй облусундагы башкармалыгынан 3 күжүрмөн эсеп (өрт өчүрүүчү унаа), 1 автошаты, 1 суу жеңдерин ташыган автоунаа (АР-2), 2 суу ташуучу унаа жана Токой чарба кызматынан 20дай кызматкер тартылды.

Мындан сырткары тез жардам, ЖКККБ жана Жамбыл облустук өзгөчө кырдаалдар департаментинен 2 күжүрмөн эсеп тартылды.

Аймактагы өрттү өчүрүүдө унааларга үзгүлтүксүз суу берүү үчүн Чүй дарыясына (ПНС -110) өрт насостук станция унаасы коюлуп, секундасына 110 литр суу берүүгө жөндөмдүү экенин далилдеди.