Turmush — Кечээ, 17-сентябрь күнү Баткендеги кыргыз-тажик куралдуу жаңжалында Баткен шаарынын 27 жаштагы тургуну Манас Баатырбеков акка моюн сунду. Бул тууралуу анын таякеси Жунус Акматов билдирди.

«Менин бир тууган жээним үйлөнө элек болчу. Үй-бүлөдө бир туугандардын улуусу, 2 иниси жана 2 карындашы бар эле. Баарынан да өкүнүчтүүсү, анын үйлөнүү үлпөт тою 2-октябрга белгиленген болчу. Үйлөнүү тоюна 1 ай калганда каза тапты. Ак-Сай айыл аймагындагы Ак-Суу дарыясында жайгашкан Головной суу бөлүштүрүүчү жайынан снаряд тийиптир. Өзү ак көңүл, жоош, момун, жөнөкөй жигит эле», — деди ал.

Кенже сержант Манас Баатырбеков Баткендеги №707 аскер бөлүктө кызмат өтөп жүргөн. Анын сөөгү бүгүн, 17-сентябрь күнү өзү туулуп-өскөн Баткен шаарынын Базар-Башы кварталында жерге берилди.

Улуттук госпиталдын директору Токтобай Маанаевдин айтымында, 14-сентябрдан бери Баткенден 9 аскер кызматкери келип түшкөн.

17-сентябрда саат 09:00гө карата ооруканаларга 103 адам түшкөн, анын ичинен 5 жабырлануучу амбулатордук дарыланууга жөнөтүлгөн.

Тажикстан менен чек арадагы жаңжалда каза болгон кыргызстандыктардын саны 24 адамга жетти.