Turmush — 1965-жылы Кемпир-Абад суу сактагычын куруу үчүн жер алуу үчүн компенсациянын алкагында өзбек тарап кыргыз тарапка чек арадан 8 тилкеден 4127 га жер бөлүп берген. Бул тууралуу 15-октябрда Жогорку Кеңештин мурунку депутаты, КРдин Коопсуздук кеңешинин мурунку катчысы, мурунку коргоо министри Исмаил Исаков Өзгөн районунун Кызыл-Октябрь айылында өткөн элдик курултайда билдирди.

Анын айтымында, бул жер тилкелери азыркы Баткен, Ош жана Жалал-Абад облустарынын аймагында жайгашкан. «Бул 300 гектар, 1000 гектар, ар кайсы аймактар. Ошол эле учурда алар биздин 1604 гектар жерди толукташкан эмес. Бургандин массивине байланыштуу убадалар аткарылган жок. Өзбек тарап дренаждык-коллектордук системаны төшөйбүз деп убада кылган, бирок аткарган эмес. Мындан улам 7 айыл аймактын аймагындагы жерлерди суу каптаган. Ушундан улам канчалаган жарандарыбыз ыңгайсыздыкка учурап, ооруп калышты. 800гө жакын турак жайда ным болгон», — деди ал.

Исмаил Исаков суу сактагычтын курулушунан улам айыл чарба жерлери жоголуп жаткандыгы тууралуу маалымат берди. Ал дамбанын бийиктиги 2 метрге көтөрүлүп, анын кесепетинен 7 миң гектар аянтты суу каптаган. Исаковдун айтымында, бул келишимде [дамбаны көтөрүү] каралган эмес.

Ал өзбек тарап 1983-жылы 170 млн кВт/саат кубаттуулуктагы ГЭСти, 2006-жылы 500 млн кВт/саат кубаттуулуктагы ГЭСти курганын маалымдады.

Исаков Кыргызстанга келтирилген зыяндын көлөмүн — кеминде 1,5 миллиард долларды түзгөнүн жарыялады.

Мурунку коргоо министри өзбек тарап курган эки ГЭСте биргелешкен башкарууну киргизүү керек деп эсептейт. «Мен Ташиевди сууну көзөмөлдөй турган биргелешкен ишкана түзүү планы боюнча колдойм», — деди ал.

13:20дан баштап көрүү керек

Курултайдын катышуучуларынын арасында Жогорку Кеңештин депутаттары Дастан Бекешев (Октябрь округу), Адахан Мадумаров («Бүтүн Кыргызстан» фракциясы), коомдук ишмерлер жана саясатчылар — парламенттин мурунку депутаты Исмаил Исаков, Кыргызстандын Малайзиядагы мурунку элчиси Азимбек Бекназаров, Жалал-Абад облусунун мурунку губернатору Бектур Асанов, саясатчы Жеңишбек Молдокматов, КРдин Коопсуздук кеңешинин мурунку катчысы Кеңешбек Дүйшебаев, өкмөттүн Талас облусундагы мурунку ыйгарым укуктуу өкүлү Айбек Бузурманкулов, Кыргызстандын Түркиядагы мурдагы атайын жана ыйгарым укуктуу элчиси, БШКнын мурдагы төрагасы Мамбетжунус Абылов бар.

Ошондой эле иш-чарага президенттин Ош облусундагы ыйгарым укуктуу өкүлү Зиядин Жамалдинов, Өзгөн районунун акими Шабдан Абыкаев келишти.

Жакын жерде атчандар турушат.

Кемпир-Абад суу сактагычы көлөмү боюнча Кыргызстандагы экинчи, Өзбекстандагы үчүнчү суу сактагыч болуп эсептелет.

Кемпир-Абад суу сактагычы боюнча бул жерден окуй аласыз.

УКМКнын төрагасы Камчыбек Ташиев Жогорку Кеңештин Эл аралык иштер, коргоо, коопсуздук жана миграция боюнча комитетинин 10-октябрдагы жыйынында кыргыз-өзбек чек арасын делимитациялоо боюнча комиссиянын сүйлөшүүсүнөн кийин Кыргызстанга кайсы тилкелер өткөнүн айтты.

Кыргызстан коммунисттик партиясынын Борбордук комитетинин мурунку биринчи катчысы, Кыргыз Республикасынын баатыры Турдакун Усубалиев китептеринин биринде Кемпир-Абад суу сактагычынын тарыхы тууралуу айрым фактыларды жазган.