Turmush — Бүгүн, 3-мартта Кочкор районунда мамлекеттик туу күнү салтанаттуу түрдө белгиленди. Бул тууралуу аймактык кабарчы билдирди.

Майрамдык салтанат Семиз-Бел айылына кире беришиндеги Ормон Хан ордосунда өлкөнүн жаңыланган туусун көтөрүү менен башталды.

Иш-чарага Кочкор районунун акими Эрмекбай Омошев жана мекеме-ишкана жетекчилери, айыл өкмөттөр, айыл аксакалдары катышты. Аким Эрмекбай Алянович райондун калкын мамлекеттик туу күнү менен куттуктап, Кыргызстандын жаңыртылып өзгөртүү киргизилген туусу көтөрүлүп жатканын, райондогу мекеме-ишканаларга келген 96 туунун баардыгы демөөрчүлөр тарабынан келгенин белгиледи.

Мамлекеттик туу 1992-жылдын 3-мартында легендарлуу парламенттин токтому менен бекитилген. Кыргыз Республикасынын президенти Садыр Жапаров тууну өзгөртүү мыйзамына 2024 -жылы 22-декабрда кол койгон. Былтыр 20-декабрда Жогорку Кеңеш мамлекеттик туунун элементтерин өзгөртүү жөнүндөгү мыйзам долбоорун экинчи жана үчүнчү окууда талкуусуз кабыл алган.