Turmush — УКМКнын төрагасы Камчыбек Ташиевдин өкүл баласы камактан бошотулду. Ал пара опузалоого шектелип камакка алынган болчу.

Буга чейин УКМК билдиргендей, колго түшүрүү операциясы 2022-жылы 11-мартта Кылмыш-жаза кодексинин 343-беренесинин (пара опузалоо) 1-бөлүгү менен козголгон кылмыш ишинин алкагында жүргүзүлгөн.

• И.А.К. — УКМКнын төрагасы Камчыбек Ташиевдин өкүл баласы. Ал Ташиев менен туугандык байланышын пайдаланып, Таш-Булак айыл өкмөтүнүн кызматкери Б.А.И. менен жең учунан сүйлөшүп алып, жеке ишкерден 120 миң сом акча опузалаган.

И.А.К. менен Б.А.И. жеке ишкерден 90 миң сом алып жаткан жеринен кармалып, Жалал-Абад ОИИБдин абагына камалган.

Turmush басылмасына Жалал-Абад облустук сотунун басма сөз кызматы билдиргендей, Жалал-Абад шаардык сотунун тергөө судьясынын 2022-жылдын 13-мартындагы токтому менен УКМКнын Жалал-Абад облустук башкы башкармалыгынын тергөө бөлүмүнүн ага тергөөчүсү Б.Б.нын шектүү И.А.Ктын бөгөт коюу чарасы катары камакка алуу түрүн тандоо жөнүндөгү өтүнмөсү канааттандырылган. И.А.К. 2 (эки) айга, тактап айтканда 2022-жылдын 12-мартынан баштап 2022-жылдын 11-майына чейин камакка алынган.

Айыпталуучунун жактоочусу макул болбой, апелляциялык арыз менен Жалал-Абад облустук сотуна кайрылган. Жалал-Абад облустук сотунун 2022-жылдын 1-апрелдеги аныктамасы менен жактоочу С.М. апелляциялык арызы канааттандыруусуз калтырылган.

Жалал-Абад шаардык сотунун тергөө судьясынын 2022-жылдын 29-апрелдеги токтому менен тергөөчү Б.Б.нын шектүү И.А.К.нын камакка алуу түрүндөгү бөгөт коюу чарасын үй камагына алмаштыруу жөнүндөгү өтүнүчү канааттандырылган. Ал 2022-жылдын 29-майына чейин үй камакта болот.