Turmush — Ош шаарында мечиттерде уурулук кылып жүргөн 27 жаштагы шектүү жигит кармалды. Бул тууралуу ШИИБдин басма сөз кызматы билдирди.

Маалыматка караганда, шектүү — Жалал-Абад облусунун Сузак районунун 1995-жылы туулган тургуну Ош шаардык ички иштер башкармалыгынын Сулайман-Тоо милиция бөлүмүнүн кызматкерлери тарабынан колго түштү. Ал Ош шаарына келип, мечиттерде намаз окуганы келген жарандар алаксып калгандыгынан пайдаланып, аларга таандык болгон буюмдарды: телефон, акча каражаттарын, сумкаларды уурдап, изин жашырып жүргөн. Бүгүнкү күндө жабырлануучулардын саны 20 адамга жакындап калды.

«Кармалган жаран уурдалган буюмдарын арзан баада соодагерлерге өткөрүп берип турган. Ага карата Кылмыш-жаза кодексинин 205-беренесинин (уурдоо) негизинде кылмыш иш козголуп, убактылуу кармоочу жайга киргизилди. Учурда тергөө иштери жүрүп жатат», — деп айтылат милициянын билдирүүсүндө.

Тергөөнүн алгачкы маалыматына караганда, шектүү буга чейин Бишкек шаарында дагы ушундай кылмыш үчүн соттолгон.