Turmush — Бакай-Ата районунун Боо-Терек айыл аймагында өзгөчө кырдаал режими киргизилди.

ӨКМдин басма сөз кызматынын маалыматына караганда, 17-февралда саат 15:00 чамасында Боо-Терек айылындагы жааган кар ээрип, арыктардан суулар ашып, 17 турак үйдүн короолорун каптаган.

Ошондой эле Шадыкан айыл аймагынын Ынтымак айылынын тоо этегинде ээриген кар 3 турак үйдүн короосун каптаган.

Суу каптоо коркунучу сакталып тургандыгына байланыштуу Боо-Терек айыл аймагына өзгөчө кырдаал режими киргизилген.

Тазалоо иштерине жарандык коргоонуу кызматтарынын жана айыл өкмөттөрүнүн инженердик техникалары тартылып, ыкчам иш-аракеттеринин натыйжасында агынды суулар коопсуз жайларга өткөрүлүп, короолорду каптаган суулар сордурулду.

Тараз—Талас—Суусамыр унаа жолунун жээгин бекемдөө иштери жүргүзүлдү.